تفزع من نومها على صوت نداءه
ــ افتحي الباب للسعيد
هي تعرف انه لا يوجد سعيد .. هي خيالات تأتيه من حين لآخر
ــ السعيد مين ياراجل مافيش حد
ــ لالا السعيد واقف اهو عند الباب
ــ نام يا حاج نام
يعود الي نومه وتشرع هي في البكاء .. تشعر بالوحدة الشديدة وبأنها عاجزة عن التحمل
أبو محمد صارت تصرفاته لا تطاق .. عنيد للغايه ..ثم انها لم تعد تحتمل خيالاته التى يحدثها
تتوجس خيفه من فكرة موته .. وتحيا تعيسه الي جواره
دقات يد أحمد تهز الباب .. تستقبله استقبال الفاتحين .. أحمد أحب أحفادها الى قلبها تحبه كما لم تحب أحدا من قبل ,تحتضنه بشدة تريد ان تملىء روحها به ,تريد ان تشبع منه
يذكرها دوما بإبنها الكبير محمد فهو يشبهه في كل شىء تقريبا ومن الممكن ان يكون هذا هو سر حبها الشديد له
تدخل من بعده أمه فردوس متسارعه الأنفاس من صعود السلم فترتمي علي الكنبه حتي تهدأ قليلا
ــ ازيك يا ماما
ــ الحمدلله يا حبيبتي ,استريحي من السلم
ــ ازيك يا بابا ,عامل ايه
ــ زي الفل يا بنتى
ــ معلش بقي سامحونى بغيب عليكم بس والله بسبب الشغل يادوب بروح اعمل الغدا وكل لما اقول هاجيلكم بعد العصر ماقدرش آجي
ــ احنا عارفين يا حبيبتي ربنا يكون في عونك
تمر الساعتين كالعادة كدقيقتين .. يتناولان فيها أحوال الأسرة وآخر الأخبار
وهي تهم بالعودة الى منزلها تخرج لها مما عندها
ــ خدى يا حبيبتى شويه عيش حلوين اهم اديت لاخوكى شويه وانتى شويه , ودا طبق حلويات بنت خالتك كانت جايباه وهى بتزورنى من كام يوم كدا ,وانتى عارفه ماحدش هنا بياكل الحاجات دى
ــ يعني كمان انتى اللى هاتجيبيلنا ياماما , مش كفايه مقصرين معاكى
ــ ماتقوليش كدا يا حبيبتى ربنا يقدرنى واجيبلك وربنا يقدرك وتجيني , أمانه عليكي يا فردوس تبقى تزوري خالتك وبنت خالتك , دول غلابه مالهمش راجل
ــ حاضر يا ماما والله
تستأذن الشمس للرحيل تاركه البيت في رتابه الاضاءة الخفيفه والسكون المظلم .. يستعد أبو محمد للصلاة فيقوم للوضوع وكالعادة ينسي موتور المياة مفتوحا
ــ قفلت الماتور يا حاج
ــ آه قفلته
ــ لا ياحاج لسه شغال ,روح اقفله مش كل شويه تنساه داحنا بندفع كهربا اد كدا ولو الماتور دا باظ مش هانعرف نجيب غيره
ــ خلاص خلاص انتى موراكيش غير الموال دا , قفلناه اتهدى بقي
تقوم هي الأخري للصلاة ثم تعود لمتابعه المسلسل ومن ثم صلاة العشاء
تعد العشاء .. ( جبن و فول)ـ
ــ مش هاتكلى يام محمد
ــ لا ياحج مش جعانه
ــ يا وليه دانتى ماكلتيش حاجه ع الغدا ,هاتعيشي ع الهوا يعني
ــ ماليش نفس يا حج وسيبنى براحتى والنبي
ــ طب خلاص انتى حرة
تتابع المسلسل الاخير وتخلد للنوم .. يظل هو جالسا على الكنبه حتي يغلبه التعب فيرتكن الى جوارها
يتبع ,,
جدتى ـ(1)ـ
ليست هناك تعليقات:
إرسال تعليق