الجمعة، 1 فبراير 2013

أن تكون سعـيـــــــدا (2)



ان تكون سعيدا يعني ان تبدأ سعادتك بإبتسامه

وبعدين فكر شويه 
فكر في الدنيا وفى احوالك 

شوف انت اصلا ايه اللى مضايقك ؟؟ لو الموضوع مضايقك اوى ممكن تبعد عنه وتعمل اى حاجه تانيه 
لكن مش هاتتخطي اى حاجه مضايقاك في حياتك غير لما تواجهها 

وانت اكتر واحد عارف امتى يقدر يواجهه همومه .. واوعى تاجلها 

خد لنفسك من نفسك فسحه .. اعمل فيها اى حاجه بتبسطك .. وغالبا الحاجات اللى بتبسطنا بتبقى بسيطه اوى 
لمسات بنفتقدها في زحمه ايامنا 
لو انت مش كسلان اصلا .. هاتعرف تبسط نفسك جداااا
 انما لو كسلان بطبعك فدى مشكله تانيه 

دور كدا وقلب جواك وافتكر حاجات كانت زمان بتسعدك وشوفايه اللى يمنع انك تعملها دلوقتى 
كنت بتحب تلعب رياضه زمان ؟؟
كلنا كنا أشقيا .. طيب ايه اللى يمنع انك تقوم دلوقتى تلعب رياضه ؟؟
اكيد مش هاتعوم في الصاله ولا تلعب كورة في حوش البيت رغم اننا كلنا كنا بنعمل كدا 
لكن هاتلاقى فى حاجات تانيه بتحب تعملها وتقدر تعملها حالا .. يعني ممكن تسيب  اللى بتقراه او اللى بتعمله وتقوم تعملك كام تمرين 

الرياضه اكتر حاجه بتخفف من الحزن والإكتئاب وبتدي شعور بالسعادة



كنت زمان بتزور قرايبك كتير .. لكن الايام باعدت ما بينكم .. في مشاكل كمان ؟؟ 
الموضوع ابسط مما تتخيل .. ممكن بمكالمه تليفون تشيل حواجز حطتها السنين والبعد 

صحابك بقالك كتير بعيد عنهم وهما بعيد عنك ؟؟ 
مشاغل الدنيا كتير ولازم تكون بتعذر الناس زي ما وصانا الرصول عليه الصلاة والسلام .. خليك انت اجدع منهم زى كل مرة وابدأ الكلام والسلام .. اخرج قابلهم 

مالكش صحاب .. اخرج اعمل لنفسك صحاب .. قابل الناس فى اى حته فى النادى فى ندوة في الجامع .. الناس حواليك في كل حته .. فبلاش حجه ماليش صحاب 

ولو حتي مش حابب تكلم حد او تشوف حد .. اخرج للدنيا .. امشى ع النيل 
اعزم نفسك على اكله حلوة فى اى مطعم .. بس عارف .. هاتبقى احلى لو انت اللى عملت الاكله دى بإيدك
كافىء نفك على اى حاجه حلوة عملتها وادى لنفسك احساس انك مبسوط .. والله هاتنبسط

لو مافيش فايدة في كل دا حاول تشترك في اى عمل خير .. من اكتر الحاجات اللى بتخرج الواحد من المود 
هاتشوف ناس كتير همها اكبر منك لكنها عايشه وراضيه ومبسوطه 
هاتحس كتير انك عملت حاجه كويسه وانك تقدر تعمل اكتر وهاتلاقى نفسك من غير ماتحس بتفكر ازاى تساعد وتساند وكمان من غير ماتحس هاتلاقى همومك جت على جنب 

الجأ لربنا .. هو اكتر حد عارف ايه اللى مضايقك وهو اكتر حد حاسس بيك 
كلنا بنتحرج نلجأ لربنا في وقت الشدة علشان مقصرين جدا في وقت الرخاء 

لكن لو مارجعتش لربنا وانت في كرب .. هاترجعله امتى ؟؟
وانت عارف ان ربنا ما بيرجعش حد خالى الوفاض .. كل من يلجأ اليه يكرمه بكرمه 


حاول دايما يكون عندك اراده انك تكون سعيد مش حزين .. دى ارادة قويه جدا 
حاول دايما ماتقعش في الفخ .. الفخ اللى بيقولك تعيش في جو الكسل والكآبه والمود الرخم والملل اللى شرخ حيطان قلبك 

الكلام دا مش مجرد كلام بيتردد والله .. دا عن تجربه ويمكن من واحد أكتر كآابه وحزن منك 

لو النيه فعلا موجودة انك تسعد نفسك .. انت اكتر واحد يعرف ازاى يسعدها 
فماتبخلش على نفسك بإنك تسعدها 



هناك 4 تعليقات:

  1. السعادة إرادة

    تدوينة مُشجعة على النهوض وفض الكسل من على الضهور

    ردحذف
  2. احساس حلو :)
    بس قاعد تقول للناس التدوينات بتاعتكم طويله وانت اصلا مطول تدوينتك :D

    ردحذف