قالوا الحب يستاهل

قالو الحب يستاهل 
تموت علشانه ميت مرة
واقول العمر مش ساهل 
يضيع منا بالساهل 
ما يتكرر ولا مرة
والاقي العمر بيعدي 
ولسه انا وحدي
عايش عيشه مضطرة

يقولو الحب يستاهل
تموت علشانه ميت مرة 
لان الحب بيحلي
مرارة العيشه لو مره
وبيدفي زوايا القلب لو بردانه
من جوا ومن برا 
وما بيفرقش بين عبده وبين حره 
ومايدققش في وشوشنا 
لو بيضا او قمحيه او سمرا
وتبقي الوحده جنب الحب
ماتكفيش قوام ذرة
والاقي قلبي انا الغاوي 
يعيد الكره
وافضل وحدي انا وحدي
عايش عيشه مضطرة

يقولو الحب هو الحلم
من غيره ما تتحقق الأحلام
يقولو الحب هو القلب 
اللى بيهون لوعه الأيام 
وهو الأمل في وقت اليأس
وهو البأس
وهو الحق اللي بيكسر
قلعه الأوهام
واقول دا كلام 
والاقي قلبي متشقق
فاقول من قله الميه 
يقول من قله الحب
فاقرر أحب 
الاقي عينيا بتدمع
لأن العمر بيودع
وايدي بتشاورلي سلام